Um 90% félaga skiluðu ekki inn reikningi á réttum tíma

Aðeins 8,69 prósent íslenskra fyrirtækja skiluðu ársreikningi sínum fyrir reikningsárið 2004 fyrir 1. september árið 2005, sem var síðasti skiladagur ársreikninga. Í lok október 2006, fjórtán mánuðum eftir lok skilatíma, höfðu 22 prósent hlutafélaga ekki enn skilað inn ársreikningi til yfirvalda vegna reikningsársins 2004. Þetta kemur fram í tölum sem Lánstraust tók saman.

Í síðustu viku greindi Markaðurinn frá því að innan fjármálaráðuneytis er í smíðum frumvarp um breytingar á lögum um ársreikninga, þar sem RSK verði veitt heimild til að sekta þau fyrirtæki sem draga að skila inn ársreikningum umfram tímamörk. Úrræði stjórnvalda við innheimtu ársreikninga eru talin of tímafrek og ómarkviss.

Eitt helsta úrræði Ríkisskattstjóra (RSK) í dag er að senda út ítrekunarbréf á skilaskyld félög sem venjulega fer í póst eftir áramót nýliðins skilaárs. Tölur Lánstrausts sýna að þá höfðu rúmlega 29 prósent félaga skilað inn ársreikningi fyrir reikningsárið 2004.

Lánstraust hefur einnig kannað hvernig heimtur eru á ársreikningum í Danmörku, Noregi og Svíþjóð miðað við tímamörk þarlendis. Þar kemur í ljós að skilin eru alls staðar yfir níutíu prósent, um 99,8 prósent í Danmörku og 94 prósent í Svíþjóð.

Könnun Lánstrausts bendir til þess að fylgni sé á milli hárrar skilaprósentu og viðurlaga er varða skiladagsetningu, því alls staðar nema á Íslandi er beitt sérstökum sektum ef ársreikningi er skilað of seint. Getur upphæðin legið á bilinu sex þúsund til 194 þúsund króna.

Lánstraust reiknar á hverju ári út líkurnar á ógjaldfærni fyrirtækja, það er líkur á því að fyrirtæki lendi í gjaldþroti eða árangurslausu fjárnámi. Niðurstöður sýna að 19,89 prósent af þeim fyrirtækjum, sem skila ekki inn ársreikningum, verða ógjaldfær árið eftir. Ógjaldfærnihlutfallið er hins vegar 2,78 prósent hjá þeim fyrirtækjum sem hafa skilað inn ársreikningi.