Byssur FL Group fullhlaðnar

Hannes Smárason, forstjóri FL Group, telur að með því að nýta alla þá kosti sem FL standi til boða geti félagið ráðist í ný verkefni fyrir 120 milljarða króna, jafnvel allt að 150 milljarða. Fjárhagslegur styrkur félagsins hefur aldrei verið meiri eftir sölu á hlut þess í Icelandair Group á dögunum.

Hagnaður FL nam tæpum ellefu milljörðum króna á fyrstu níu mánuðum ársins og jókst um 67 prósent á milli ára. Á þriðja ársfjórðungi hagnaðist félagið um 5.257 milljónir sem er þrettán prósenta aukning frá sama tíma í fyrra. Hins vegar dróst hagnaður félagsins fyrir skatt saman um tólf prósent milli ára.

Uppgjör ársfjórðungsins var heldur undir meðaltalsspá markaðsaðila sem hljóðaði upp á sex milljarða króna.

Hreinar fjárfestingatekjur voru 565 milljónir króna og dró styrking krónunnar úr hagnaði af fjárfestingum.

Frá lokum september hefur efnahagur FL tekið gjörbreytingum í kjölfar sölu á Icelandair. Þegar horft er til fyrstu tíu mánaða ársins nam hagnaður fyrir skatta 36 milljörðum króna samkvæmt óendurskoðuðu uppgjöri og óx eigið fé úr 112 milljörðum í lok september í 131 milljarð mánuði síðar. Eiginfjárhlutfall félagsins var yfir 53 prósent í lok október.