Teymi semur við Kaupþing

Upplýsingatækni- og fjarskiptafyrirtækið Teymi hefur samið við Kaupþing banka um viðskiptavakt á útgefnum hlutabréfum félagsins. Félagið var skráð í Kauphöll Íslands í síðustu viku, en starfsemi þess var áður hluti af Dagsbrún. Tilgangurinn með viðskiptavaktinni er sagður vera að efla viðskipti með hlutabréf félagsins í Kauphöllinni, en Kaupþing skuldbindur sig til að setja daglega fram kaup- og sölutilboð í Teymi að lágmarki 500.000 að nafnvirði á gengi sem bankinn ákveður í hvert skipti. „Hámarksmunur á kaup- og sölutilboðum skal ekki vera meiri en 1,5 prósent og frávik frá síðasta viðskiptaverði ekki meira en 3 prósent. Hámarksfjárhæð heildarviðskipta dag hvern sem Kaupþing banki hf. er skuldbundinn til að kaupa eða selja skal vera kr. 50.000.000 að markaðsvirði,“ segir í tilkynningu til Kauphallar í gær.