Tottenham keypti Murphy á elleftu stundu

Úrvalsdeildarlið Tottenham keypti miðjumanninn Danny Murphy frá Charlton á elleftu stundu fyrir lokun félagaskiptagluggans á miðnætti í kvöld. Kaupverðið er rétt undir 2 milljónum punda og kveðst Murphy mjög spenntur að vera genginn í raðir félagsins.

Murphy byrjaði leiktíðina af krafti og var óstöðvandi í fyrstu leikjunum í haust, þar sem Charlton vann hvern leikinn á fætur öðrum. Síðan hefur þó heldur hallað undan fæti hjá Murphy, en hann vonast til að geta rétt sinn hlut með því að skipta um félag.