Trezeguet með tvö mörk fyrir Juventus

David Trezeguet skoraði tvívegis fyrir Juventus í kvöld þegar liðið sigraði Livorno 1-3 á útivelli í ítölsku úrvalsdeildinni í knattspyrnu í kvöld. Alessandro Del Piero gulltryggði sigur Juve á lokasekúndum leiksins eftir að Trezeguet hafði komið gestunum tvisvar yfir í leiknum. Marc Pfertzel jafnaði fyrir Livorno á 53. mínútu en Trezeguet kom Juve aftur yfir mínútu síðar.

Juventus komst í 13 stiga forskot á toppi deildarinnar með sigrinum í kvöld en AC Milan er í 2. sæti með 62 stig og á leik til góða á morgun. Livorno er í 6. sæti með 44 stig.

Í hinum leik kvöldsins á Ítalíu vann Cagliari 1-2 útisigur á botnliði Treviso. Cagliari er í fimmta neðsta sæti deildarinnar og komst í 30 stig með sigrinum í kvöld og eru nú fjórum stigum frá fallsæti.