Lofa glæsilegri rokkhátíð alþýðunnar

24. mars 2006 08:00

Skrifað undir samninga við bakhjarla í gær. MYND/Vilhelm

Notalegtheit og náungakærleikur verða í fyrirrúmi þegar rokkhátíð alþýðunnar, Aldrei fór ég suður, verður haldin í þriðja sinn á Ísafirði nú um páskana. Yfir tuttugu sveitir, allt frá heimsfrægum aðkomumönnum til lítt þekktra heimamanna, munu þar skemmta sér og öðrum en færri sveitir komust að en vildu.

Hátíðin er hugarfóstur feðganna Guðmundar M. Kristjánssonar hafnarstjóra og Arnar Elíasar Guðmundssonar, sem er betur þekktur sem Mugison. Óhætt er að segja hátíðin skarti glæsilegum tónlistarmönnum í ár og skal þar fyrstan nefna forsprakkan sjálfan Mugison. Þá stíga listamenn eins og Ghostdigital, Jet Black Joe og Benni Hemm Hemm á svið að ógleymdum Drengjakór MÍ, Harmonikkufélagi Vestfjarða og Jóni Kr. Ólafssyni sem eru meðal fulltrúa heimamanna.

Alls sóttust um 60 sveitir eftir því að spila á hátíðinni sem fram fer 15. apríl í Edinborgarhúsinu en aðeins um þriðjungur þeirra komst að. Það má einnig búast við að fjöldi fólks leggi leið sína vestur en um þrjú þúsund manns sóttu hátíðina í fyrra.

Um leið og hátíðin var kynnt í var skrifað undir samning við bakhjarla hátíðarinnar, Glitni, Símann og Flugfélag Íslands en þeir munu styðja við hátíðina fram til ársins 2008.

Allir lista- og tæknimenn sem koma að hátíðinni gefa vinnu sína og segir Mugison að sömu gildi verði í heiðri höfð og fyrri ár. Mugison segir stemmninguna mjög sérstaka sem hann hafi ekki fundið annars staðar. Fólk komi með opnum hug að hlusta á tónlist og sýna sig og sjá aðra.

Og það er engin sveit merkilegri en önnur á þessari hátíð því sveitirnar fá allar svipaða tíma til að spila. Mugison hvetur fólk til að kíkja á hátíðina. Bæði fólkið og sveitarfélögin séu æðisleg og gott að vera fyrir vestan. Fólk geti þarna prófað eitthvað nýtt.

Lífið Menning

Mest lesið

Fleiri fréttir

Mest lesið

Fleiri fréttir

Mest lesið

Tarot dagsins