Defoe er ekki til sölu

Eins og búast mátti við varð Daniel Levy, stjórnarformaður Tottenham Hotspurs, ekki sérlega ánægður með ummæli Rafa Benitez hjá Liverpool í dag, en stjórinn sagði að Lundúnaliðið væri að reyna allt sem það gæti til að selja framherja sinn Jermain Defoe.

"Það er nákvæmlega ekkert til í því sem Benitez sagði í dag. Við erum ekki að reyna að selja Defoe, ekki einu sinni að hugsa um það á nokkurn hátt enda er enginn fótur fyrir þessum fullyrðingum," sagði Levy.

"Að láta svona út úr sér er ekkert annað en vanvirðing við leikmanninn og svona ummæli verða til þess að leikmaðurinn fer að spyrja sig spurninga. Ég býst fastlega við því að herra Benítes taki þessi ummæli sín til baka," bætti stjórnarformaðurinn við.