Hafa náð meira af amfetamíni nú en allt árið í fyrra

Lögregla hefur, það sem af er ársins, lagt hald á meira magn af amfetamíni heldur en allt árið í fyrra. Einn Íslendinganna þriggja, sem úrskurðaðir voru í gæsluvarðhald á föstudaginn langa vegna umfangsmikils fíkniefnamáls, kom líka við sögu í stóru fíkniefnamáli árið 2004 en var ekki ákærður.

Það sem af er árinu segja bráðabirgðatölu frá ríkislögreglustjóra að þegar hafi náðst 9,4 kíló af amfetamíni og er þá ekki talið með umfangsmikla málið sem NFS sagði frá í fréttum í gærkvöldi. Þar er um að ræða samkvæmt heimildum á þriðja tug kílóa af hassi og amfetamíni og því ljóst að árangurinn er mun betri í ár heldur en allt árið í fyrra þegar náðust rúm fjórtán kíló.

Málið sem nú er til rannsóknar hjá Lögreglunni í Reykjvík kom fyrst upp þann þriðja apríl síðastliðinn þegar tollgæslan fann fíkniefnin í notaðri fólksbifreið sem flutt hafði verið til landsins. Lögreglan lét til skarar skríða að kvöldi skírdags þegar þrír menn tæmdu bílinn af fíkniefnum í iðnaðarhúsi á Höfðanum í Reykjavík. Þrír Íslendingar og einn Hollendingur var úrskurðaðir í gæsluvarðhald í framhaldinu. Einn Íslendinganna kom líka við sögu í stóru fíkniefnamáli árið 2004 en var ekki ákærður.

Það ár fundust átta kíló af amfetamíni sem flutt voru inn með Dettifossi frá Hollandi. Tveir Íslendingar voru handteknir ytra. Sá síðarnefndi var ekki framseldur þar sem hann var ekki talinn tengjast innflutningnum en við húsleit í Hollandi þar sem hann dvaldi fannst kíló af amfetamíni og tuttugu kíló af maríjúana. Ásamt Íslendingnum tengdist málinu Hollendingur sem húsleitin var gerð hjá. Nú hefur Íslendingurinn hins vegar verið handtekinn vegna málsins sem upp komst á skírdag en þar fundust, samkvæmt heimildum, á milli tuttugu og þrjátíu kíló af fíkniefnum. Óstaðfestar heimildir herma að Hollendingur sem nú situr í haldi íslensku lögreglunnar sé sá sem Íslendingurinn bjó hjá á sínum tíma úti í Hollandi.