Ég er orðinn leikmaður Tottenham

Miðjumaðurinn Didier Zokora frá Fílabeinsströndinni sagði breskum fjölmiðlum í dag að hann væri orðinn leikmaður Tottenham. Zokora er samningsbundinn franska liðinu St. Etienne, en fregnir herma að enska félagið sé að ganga frá kaupum á honum fyrir rúmar átta milljónir punda.

Zokora hefur verið eftirsóttur af stærstu liðunum á Englandi í nokkurn tíma og ekki hafa vinsældir hans dvínað eftir frábæra frammistöðu hans með liði Fílabeinsstrandarinnar á HM. Hann er 25 ára gamall og er duglegur og varnarsinnaður miðjumaður, sem þó hefur sýnt góða tilburði framar á vellinum.

Zokora sagði breska blaðinu News of the World að Tottenham hefði verið það lið sem hefði haft upp á mest að bjóða fyrir sig sem leikmann, því hann hefur augastað á því að vera í byrjunarliði úrvalsdeildarliðs í London.