Tilþrifalítill sigur Englendinga

Englendingar tryggðu sér í dag sæti í 8-liða úrslitunum á HM þegar þeir lögðu lið Ekvador 1-0 í Stuttgart. David Beckham skoraði sigurmark enskra beint úr aukaspyrnu í síðari hálfleik, en þar með eru tilþrif liðsins upptalin. Englendingar mæta Hollendingum eða Portúgölum í næstu umferð.

Ekki er hægt að segja annað en að spilamennska enska liðsins hafi valdið nokkrum vonbrigðum á HM, því þó hrósa megi liðinu fyrir þolinmæði og það að vera komið í 8-liða úrslit keppninnar - hefur verið hreint út sagt hundleiðinlegt að horfa á liðið spila. Sven-Göran Eriksson stillir upp varnarsinnuðu liði sem þorir ekki að taka nokkra einustu áhættu í leik sínum og segja má að lítil reisn hafi verið yfir enska liðinu þegar leikmennirnir fengu hvert gula spjaldið á eftir öðru fyrir tafir í dag.