Staðráðinn í að fara frá Chelsea

Argentínski framherjinn Hernan Crespo er harðákveðinn í að fara frá Englandsmeisturum Chelsea í sumar og hefur enn á ný ítrekað ósk sína um að snúa aftur til Ítalíu. Talið er að annað Mílanó-liðanna verði fyrir valinu.

"Allir vita að ég á þá ósk heitasta að spila aftur á Ítalíu," sagði Crespo í samtali við Corriere dello Sport á Ítalíu. "Meira að segja Chelsea, sem hingað til hefur ekki viljað sleppa mér, er að sýna máli mínu skilning. Roman Abramovich hefur beðið mig að fara ekki, en málið snýst ekki um peninga. Hann veit að ég vil fara og hefur nú sett mig á sölulista. Inter eða AC Milan - bæði kæmu vel til greina fyrir mig. Ég spilaði með þeim báðum á sínum tíma og held ég hafi staðið mig ágætlega," sagði Crespo.