Tilbúinn að taka áhættu á Anelka

Harry Redknapp segist vera tilbúinn að taka áhættuna á því að kaupa franska framherjan Nicolas Anelka frá tyrkneska liðinu Fenerbahce, þó leikmaðurinn hafi mjög slæmt orð á sér fyrir að vera vandræðagemlingur.

Portsmouth hefur þegar gert tilboð í Anelka upp á rúmar 8 milljónir punda, en félögin hafa þó enn ekki komist að niðurstöðu í málinu. Anelka segist vera til í að ganga í raðir Portsmouth, en Bolton er talið vera búið að gefast upp á að reyna að landa honum vegna verðmiðans sem er á honum. Harry Redknapp telur að það yrði vel áhættunnar virði að kaupa Anelka.

"Fólk segir mér að ég sé galinn að ætla að kaupa Anelka, en ég lít þannig á að hann hafi mikla hæfileika sem koma okkur til góða. Ég man hvernig það var þegar ég var hjá West Ham og keypti Di Canio, þá sagði fólk að ég væri brjálaður að kaupa svona villing - en hann endaði á því að verða goðsögn hjá félaginu."