Íhugaði að fara til Newcastle

Framherjinn öflugi Wayne Rooney hjá Manchester United greinir frá því í æfisögu sinni sem kemur út fljótlega að hann hafi átt í miklum deilum við David Moyes, stjóra Everton, rétt áður en hann gekk í raðir Manchester United. Hann segir að um tíma hafi Newcastle verið eina liðið sem sýndi sér áhuga og segir að líklega hefði hann frekar farið þangað en að vera áfram hjá Everton.

"Ég hefði farið nánast hvert sem er til að losna undan David Moyes, hann var svo ráðríkur og yfirþyrmandi," sagði Rooney sem sagði Moyes á einni af síðustu æfingum sínum að hann vildi aldrei aftur spila undir stjórn hans.

"Newcastle var um tíma eina liðið sem var til í að kaupa mig og ég hefði farið þangað í stað þess að vera áfram hjá Everton, en þá kom Manchester United inn í myndina og eftir það var aldrei spurning hvert ég vildi fara," sagði Rooney.