Ótímabært að ræða hvort NATO sendi lið til Líbanon

Fjórir liðsmenn friðareftirlitssveitar Sameinuðu þjóðanna í Líbanon féllu í loftárás Ísraelshers á bækistöð þeirra í suðurhluta landsins í nótt. Kofi Annan, framkvæmdastjóri samtakanna, segir að svo virðist sem árásin hafi verið gerð af ráðnum hug. Það segja Ísraelsmenn af og frá.

Ehud Olmert, forsætisráðherra Ísraels, segir ummæli Annans koma sér á óvart. Ísraelar harmi árásina og hann hafi gert framkvæmdastjóranum grein fyrir því í síma í morgun. Olmert hefur fyrirskipað rannsókn á árásinni. Friðargæslulið Sameinuðu þjóðanna, Unifil, hefur verið að ströfum við landamæri Líbanons og Ísraels síðan 1978 og eru liðsmenn þar nú um tvö þúsund.

Eftirlitsmennirnir fjóri sem féllu í morgun voru í bækistöð sinni í bænum Khima í Suður-Líbanon í gærkvöldi þegar árásin var gerð. Þeir voru frá Austurríki, Finnlandi, Kanada og Kína.

Þegar fréttir bárust fyrst af árásinni var fundur um ástandið í Líbanon að hefjast í Róm á Ítalíu. Fundinn sækja utanríkisráðherrar ýmissa ríkja og fulltrúar alþjóðasamtaka. Fulltrúar Ítalíu og Bandaríkjanna leiða fundinn. Ísarelar, Íranar og Sýrlendingar sitja hann ekki.

Frakkar lýstu því yfir í morgun að þeir ætluðu að leggja fram fyrsta uppkast af ályktun um vopnahlé í Líbanon sem hægt yrði að leggja fyrir Öryggisráð Sameinuðu þjóðanna.

Gert var ráð fyrir því að Javier Solana, utanríkismálastjóri Evrópusambandsins, kynni tillögu um alþjóðlegt herlið sem yrði sent til Suður-Líbanon. Þar yrðu franskir, spænskir og þýskir hermenn í meirihluta og til viðbótar herlið frá Hollandi, Kanada og Tyrklandi auk Arabaríkja á borð við Egyptaland og Sádí Arabíu.

Chirac, Frakklandsforseti, sagði í morgun að Frakkar væru reiðbúnir að taka að sér leiðandi hlutverk í því verkefni. Hann sagðist þó ekki telja rétt að slíku herliði yrði gert að afvopna skæruliða Hizbollah.

Rætt hefur verið um þann möguleika að Atlandshafsbandalagið hafi umsjón með alþjóðlega herliðinu en Jaap de Hoop Scheffer, framkvæmdastjóri bandalagsins, sagði í morgun að allt tal um slíkt væri ótímabært. Hann vildi þó ekki útiloka aðkomu NATO. Enn væri eftir að ræða hvort fjölþjóðlegt herlið yrði sent á svæðið og þá hvert umboð þeirra yrði.