60 þúsund deyja árlega af völdum sólarinnar

Sólin verður um sextíu þúsund manns að bana um allan heim á ári hverju að mati Alþjóða heilbrigðismálastofnunarinnar. Flest dauðsföllin verða af völdum húðkrabbameins.

Þekktasta orsök húðkrabbameina er útfjólublá geislun frá sólinni eða ljósabekkjum. Í nýrri skýrslu Alþjóða heilbrigðisstofnunarinnar um skaðleg áhrif sólbaða, þeirri fyrstu sinnar tegundar, segir að of mikil útfjólublá geislun valdi einnig sólbruna og frunsu auk þess sem hún veldur því að húðin eldist mun fyrr en ella. Einfalt mál sé að hylja líkama sinn í sólinni meira en fólk gerir í dag til þess að fækka dauðsföllum til muna.

Sérfræðingar stofnunarinnar segja fólk vissulega þurfa að sóla sig en gæta þurfi þess að ekki sé farið út í öfgar. Hvað húðkrabbameinið varðar segir í skýrslunni að auðvelt sé að koma í veg fyrir að allt fari á versta veg með því að leita að blettum á líkama fólks og snú sér til sérfræðings ef þurfa þykir. Einnig sé rétt að nota sólarvörn og forðast ljósabekki.

Sérfæðingar segja ljóst að allir verði fyrir einhverri útfjólublárri geislun og lítið magn geri heilsunni aðeins gott og skipti máli við framleiðslu á D vítamíni í húðinni. Geislun sé mismikil yfir daginn og eftir árstíðum og mest þegar sól er hátt á lofti. Auk þess er rétt að huga að því á hverju er gengið þegar sól skín í heiði. Gras, mold og vatn endurkastar innan við tíu prósentum af útfjólubláum geislum en snjór um áttatíu prósentum, sandur á strönd um fimmtán prósentum og frussandi sjórinn um tuttugu og fimm prósentum.

Sé litið til veðurfarsins víða í Evrópu þessa dagana eru viðvaranir Alþjóða heilbrigðisstofnunarinnar orð í tíma töluð og ferðalangar hvattir til að hafa með sér sólarvörn, sólgleraugu og hatta og gæta þess að taka ekki bara stuttbuxur og ermalausa boli með sér.