Öryggisreglur gilda um alla flugfarþega

Íslensk stjórnvöld hafa ákveðið að þær kröfur sem gerðar hafa verið til flugfarþega á leið til Bretlands og Bandaríkjanna gildi nú um alla farþega þar til annað verður ákveðið. Yfirvöld í Bretlandi hafa lækkað viðbúnaðarstig í landinu vegna hryðjuverkahættu.

Hættuástand hefur verið í gildi í Bretlandi frá því á fimmtudag en þá var greint frá því að tekist hefði að koma í veg fyrir að hryðjuverkamenn sprengdu upp flugvélar á leið frá Bretlandi til Bandarríkjanna. Á þriðja tug manna hefur verið handtekinn, grunaður um aðild að málinu. John Reid, innnanríkisráðherra Bretlands, sagði á blaðamannafundi í morgun að enn væri mikil hætta á hryðjuverkaárás eða árásum en hættan væri ekki yfirvofandi. Hann hvatti landa sína til þess að vera á varðbergi. Um leið og viðbúnaðarstigi var breytt voru reglur um handfarangur í flugi rýmkaðar aðeins. Reglurnar taka gildi strax en verður ekki beitt fyrr en á morgun á stærstu flugvöllum Bretlands. Sýslumaðurinn og flugvallarstjórinn á Keflavíkurflugvelli hafa aftur á móti ákveðið að þær sértækur aðgerðir sem undanfarna daga hafa einungis beinst að farþegum til Bretlands og Bandaríkjanna munu framvegis eiga við um alla flugfarþega þar til annað verður ákveðið. Frá og með morgundeginum verður ekki er lengur leyfilegt að hafa meðferðis í handfarangri vökva, við vopnaleit þurfa allir farþegar að fara úr skóm sem verða gegnumlýstir. Farþegar á leið til Bandaríkjanna þurfa að gangast undir aukið eftirlit og þeir sem fljúga vestur um haf fá þann vökva sem keyptur er í sölubúðum í Flugstöð Leifs Eiríkssonar við brottfararhlið. Undanþegið banninu er mjólk og matur fyrir ungabörn og nauðsynleg lyf að hámarki 240 ml. Af þessum sökum er mælst til þess að farþegar mæti til flugstöðvarinnar ekki síðar en tveimur klukkustundum fyrir áætlaða brottför vegna þeirra tafa sem þetta kann að valda.