Hariri harðorður

Ísraelskt herlið er nú að yfirgefa hluta af Suður-Líbanon og eftirlætur líbönsku herliði og alþjóðlegum friðargæsluliðum að gæta vopnahlés milli Hisbollah og Ísraelshers. Leiðtogi stærsta flokkabandalagsins á líbanska þinginu segir Sýrlandsforseta hafa hvatt til uppreisnar í Líbanon með ræðu sinni í vikunni.

Saad Hariri, leiðtogi stærsta flokkabandalagsins á líbanska þinginu, var ómyrkur í máli í morgun þegar hann ávarpaði mörg hundruð stuðningsmenn. Hann sagði sögu Ísraela svarta og fulla af harti og eyðileggingu. Ísraelar geti eyðilagt landið en ekki samstöðu Líbana. Hariri er sonur Rafik Hariris, fyrrverandi forsætisráðherra Líbanons, sem var myrtur í fyrra.

Hariri yngri fór hörðum orðum um ræðu Assads, Sýrlandsforseta, sem hann flutti fyrr í vikunni. Assad sakaði andstæðinga Sýrlendinga í Líbanon um að hafa lagt lag sitt við Ísraela. Þetta sagði Hariri aðeins sagt til að auka á deilur í Líbanon þar sem Sýrlendingar hafi haldið herliði í tuttugu og níu ár. Hann sagði ræðu Assads fela í sér hvatningu til uppreisnar.

Líbanskir hermenn eru nú komnir suður fyrir Litani-ána margumtöluðu sem markar hernaðarlega mikilvæg mæri þess svæðis sem Ísraelar vilja hafa sem öryggissvæði fyrir norðan landamæri sín.

Utanríkisráðherra Ísraels tilkynnti í morgun að ísraelsher myndi draga sig til baka af helmingi þess svæðisins eftir því sem líbanski herinn nær þangað. Ísraelsmenn hafa þegar vikið fyrir friðargæsluliðum sem fyrir voru í Líbanon í svonefndum UNIFIL-sveitum á nokkrum stöðum og látið þeim eftir að tryggja frið, meðal annars í bænum Marjayoun, þar sem átök voru hörð.

Frakkar hafa samþykkt að leiða 15 þúsund manna friðargæslulið til viðbótar sem ætlunin er að senda til Líbanons á næstu dögum og vikum. Þeir munu einnig leggja til vænan hluta þess liðs en enn er ekki fullvíst hvaða lönd önnur muni leggja til mannskap til friðargæsluliðanna. Þeir eru þó varkárir og vilja vera í sátt við alla aðila, ríkisstjórnirnar í Líbanon og Ísrael, sem og skæruliðasamtökin Hisbollah. Umfram allt vilja þeir forðast að dragast inn í blóðug átök sem gætu blossað upp ef þeir reyna að afvopna Hisbollah með valdi en að sama skapi má friðargæsluliðið ekki verða máttlausir áhorfendur ef það hefur ekki heimild til beitingar vopna ef með þarf.