Tvímenningar gefa sig fram

Mennirnir tveir sem leitað hefur verið að í tengslum við árásir á bensínstöð Skeljungs í Fellahverfi í Breiðholti í fyrrinótt hafa gefið sig fram við lögreglu. Það gerðu þeir nú síðdegis eftir að lögregla hafði birt myndir af þeim úr öryggismyndavél og hvatt þá til að gefa sig fram. Mennirnir eru grunaðir um að hafa stungið öryggisvörð í bakið og kýlt starfsmann Select í gagnaugað. Öryggisvörðurinn reyndist minna særður en talið var í fyrstu þar sem hnífurinn stöðvaðist á rifbeini hans. Að sögn lögreglu eru yfirheyrslur yfir mönnunum að hefjast en ekki liggur fyrir hvort krafist verður gæsluvarðhalds yfir þeim.