Brottflutningi frá Líbanon ljúki fyrir helgi

Ísraelsher lýkur brottflutningi sínum frá Suður-Líbanon fyrir helgina. Þetta hefur ísraelskur þingmaður eftir yfirmanni hersins. Nýtt ár hefst hjá gyðingum við sólsetur á föstudag og er haft eftir hershöfðingjanum að liðsflutningunum verði lokið fyrir þann tíma. Ísraelsk hermálayfirvöld hafa undanfarnar vikur dregið lið sitt til baka frá Líbanon eftir að friði var komið á milli Ísraela og Hizbollah-skæruliða í kjölfar átaka í júlí og ágúst. Alþjóðlegt friðargæslulið á vegum Sameinuðu þjóðanna er nú komið til Suður-Líbanon og er því ætlað að sjá til þess að ekki slái aftur í brýnu milli Ísraela og Hizbollah.