Segjast ekki hafa hugmynd um hvar bin Laden sé niðurkominn

Pakistönsk yfirvöld hafa engar upplýsingar um það hvar Osama bin Laden er niðurkominn eða hvort hann er á lífi. Þetta sagði talsmaður utanríkisráðuneytis landsins í dag.

Franskt dagblað greindi frá því um helgina að samkvæmt upplýsingum frönsku leyniþjónustunnar hefði bin Laden látist úr taugaveiki í Pakistan í síðasta mánuði. Utanríkisráðherra Frakklands neitaði þessu í gær og í dag sögðust pakistönsk yfirvöld ekki hafa hugmynd um hvar hann væri. Benti talsmaður utanríkisráðuneytisins á að leiðtogar talibana væru í Afganistan og neitaði því að stjórnvöld í Pakistan styddu við íslamska uppreisnarmenn í nágrannríkinu.