Landsliðsferlillinn virðist vera búinn

Ruud Van Nistelrooy segir það skrítna tilfinningu að tala um feril sinn sem landsliðsmaður í þátíð, en hann á alls ekki von á því að fá að spila annan landsleik undir stjórn núverandi landsliðsþjálfara, Marco Van Basten.

Nistelrooy hefur ekki spilað fyrir þá appelsínugulu síðan í lokaleik riðlakeppninnar á HM og var ekki valinn í nýjasta landsliðshópinn á dögunum.

"Vissulega er skrítið að tala um landsliðsferilinn í þátíð, því mér finnst ég sannarlega eiga heima í hópnum, en mér sýnist ég vera kominn alveg út í kuldann hjá núverandi landsliðsþjálfara. Það mun þó ekki aftra mér að svara kallinu ef það kæmi í framtíðinni," sagði Nistelrooy sem leikur með Real Madrid á Spáni.