Banaslys á Miklubraut í nótt

Banaslys varð á Miklubraut um klukkan hálffjögur í nótt þegar ekið var á konu á sextugsaldri. Atvikið var með þeim hætti að bifreið var ekið austur Miklubraut að Háaleitisbraut og var konan á gangi á afrein sem liggur af Miklubraut inn á Háaleitisbraut til suðurs.

Bifreiðinni var ekið inn á þá akrein og sá ökumaður ekki konuna í myrkvinu en hún var dökkklædd. Talið er að hún hafi látist samstundis. Karlmaður sem var á gangi með konunni slapp ómeiddur. Ökumaður bílsins, sem er á þrítugsaldri, og vitni voru færð á slysadeild til aðhlynningar og áfallahjálpar. Miklubraut var lokað í um tvær klukkustundir í nótt meðan unnið var á vettvangi. Ekki verður greint frá nafni hinnar látnu að svo stöddu. Þetta er tuttugasta og fyrsta banaslysið í umferðinni á árinu en allt árið í fyrra voru þau nítján.