Óvíst hvort al-Masri er lífs eða liðinn

Írakar rannsaka nú erfðaefni úr látnum manni til að kanna hvort hann hafi verið Abu Ayyub al-Masri, nýr leiðtogi al-Qaeda í Írak. Tvær arabískar sjónvarpsstöðvar fullyrða að hann hafi fallið í loftárásum Bandaríkjamanna fyrr í vikunni.

Talsmaður Bandaríkjahers segir ekkert hæft í þeim fréttum. Fjölmargir al-Qaeda liðar munu hafa fallið í loftárásinni.

Masri, sem er Egypti, tók við stjórn al-Qaeda í Írak eftir að fyrirrennari hans, Abu Musab al-Zarqawi, féll í loftárás Bandaríkjamanna í júní síðastliðnum.