Dæmt í Enronmálinu

Dómur verður kveðinn upp í dag í máli Jeffrey Skilling, fyrrum forstjóra bandaríska orkurisans Enrons, sem varð gjaldþrota árið 2001. Skilling var fundinn sekur um 19 brot, þar á meðal bókhalds- og innherjasvik með það fyrir augum að fela tap orkufyrirtækisins og gæti átt yfir höfði sér á milli 20 til 30 ára fangelsisdóm auk greiðslu sektar.

Kenneth Lay, fyrrum stjórnarformaður Enron, var fundinn sekur um sömu brot og Skilling í maí. Hann lést í júlí. Þá var fyrrum fjármálastjóri fyrirtækisins sömuleiðis dæmdur til sex ára fangelsisvistar fyrir nokkru.

Lögfræðingur Skillings hefur farið fram á að skjólstæðingur sinn hefji ekki afplánun fyrr en eftir 27. nóvember næstkomandi svo hann geti notið Þakkargjörðarhátíðarinnar.

Við gjaldþrot Enronrisans misstu 21.000 manns vinnuna. Fyrirtækið skuldaði heila 31,8 milljarða bandaríkjadali eða rúmlega 2.100 milljarða íslenskra króna og var eitt stærsta gjaldþrotamál sögunnar.