Spá óbreyttum stýrivöxtum

Seðlabankinn ákveður stýrivexti á fimmtudag samhliða útgáfu Peningamála. Greiningardeild Glitnis reiknað með að bankinn haldi vöxtum sínum óbreyttum en útilokar ekki 25 punkta hækkun. Stýrivextir Seðlabankans standa í 14 prósentum í dag.

Í Morgunkorni greiningardeildar Glitnis segir að gengi krónunnar hafi hækkað mikið síðustu vikur, verðbólgan hjaðnað, verðbólguhorfur batnað og verðbólguálag á fjármálamarkaði hafi dregist snarlega saman. Þá gefi aðstæður á íbúðamarkaði til kynna að hækkun íbúðaverðs verði ekki verðbólguvaldur á næstunni. Seðlabankinn geti því auðveldlega litið svo á að ekki sé þörf á frekari vaxtahækkun sem stendur.

Ennfremur segir deildin að Seðlabankinn muni að öllum líkindum leggja áherslu á að enn sé rík þörf á aðhaldi þótt verðbólguhorfur hafi batnað nokkuð og því sé hækkun hugsanleg. „Áfram verður því aðhaldstónn í skilaboðum Seðlabankans enda mælist verðbólgan enn mikil og ekki er gefið að verðbólgumarkmið bankans náist," segir í Morgunkorninu.

Þá segir: „Eftir innkomu erlendra spákaupmanna, sem hafa tekið stórar stöður með krónunni, má segja að gengisáhætta sé nú meiri en áður. Ekki er ljóst hver viðbrögð þeirra yrðu ef Seðlabankinn boðaði nú vaxtalækkunarferli en í versta falli myndi stór hluti þeirra loka stöðum sínum. Seðlabankinn þarf því að stíga varlega til jarðar þegar kemur að því að boða lok vaxtahækkunarferlisins. Gengisþróun krónunnar mun ráða miklu um hvort verðbólgan hjaðnar jafn hratt á næstunni líkt og spár gefa nú til kynna eða hvort hún verður áfram mikil," segir í Morgunkorni Glitnis.