Bretar verjast yfirtöku Þjóðverja

Breska gervihnattasjónvarpsstöðin BSkyB hefur keypt 17,9 prósenta hlut í ITV, einu stærsta einkarekna sjónvarpsfélagi Bretlands. Kaupverð nemur 940 milljónum punda eða 124,3 milljörðum íslenskra króna. Kaupin eru sögð vörn Breta gegn yfirtöku þýskrar sjónvarpsstöðvar á ITV.

Breska ríkisútvarpið hefur eftir stjórnendum félagsins að BSkyB hafi ekki í hyggju að gera yfirtökutilboð í sjónvarpsstöðina heldur sé um langtímafjárfestingu að ræða.

Eigandi BSkyB er fjölmiðlakóngurinn Rupert Murdoch en sonur hans James Murdoch, er forstjóri BSkyB.

ITV er rekið að flestu leyti með sölu auglýsinga. Samdráttur í sölu þeirra hefur hins vegar haft talsverð áhrif á hagnað sjónvarpsstöðvarinnar og sagði Charles Allen, forstjóri fyrirtækisins, upp störfum í ágúst m.a. vegna þessa. Enginn fastur forstjóri er starfandi hjá fyrirtækinu en fjármálastjóri hefur gegnt starfi forstjóra tímabundið á meðan annars er leitað.

Þá segir BBC stjórnendur breska fjarskiptafyrirtækisins NTL hafa rætt við stjórnendur ITV um hugsanlegan samruna í síðustu viku. Viðræðurnar munu að sögn BBC hafa farið í gang í kjölfar þess að þýska sjónvarpsstöðin RTL var sögð íhuga að gera 5 milljarða punda eða ríflega 660 milljarða króna yfirtökutilboð í ITV.

Þá hefur BBC eftir ritstjóra viðskiptafrétta hjá ríkisútvarpinu að BSkyB sé samkvæmt breskum fjarskiptalögum ekki heimilt að kaupa meira en 20 prósenta hlut í ITV og séu kaupin því klárlega til þess fallin að koma í veg fyrir yfirtöku NTL á félaginu.