Samkynhneigðir unnu sigur á færeyska lögþinginu

Færeyska lögþingið hefur samþykkt, með 17 atkvæðum gegn 13, að samkynhneigðir skuli njóta lagaverndar gegn háði og ofsóknum. Samskonar frumvarp var fellt með yfirgnæfandi meirihluta á síðasta ári.

Færeyingar hlutu bágt fyrir þá afgreiðslu og málið var meðal annars tekið upp á síðasta þingi Norðurlandaráðs, þar sem færeysku fulltrúarnir sögðu að Rannveig Guðmundsdóttir, þingmaður Samfylkingarinnar, hefði móðgað færeysku þjóðina með málflutningi sínum.

Nú virðist allavega kominn meirihluti á lögþinginu fyrir því að vernda samkynhneigða. Fastlega er búist við að málið verði endanlega afgreitt við þriðju umræðu, í næstu viku.