Valkyrjur í vígahug

Þrjár breskar konur, vopnaðar handtöskum sínum, stöðvuðu hættulegan glæpamann sem var á flótta undan lögreglunni, og komu honum undir manna hendir. Maðurinn var eftirlýstur fyrir árásir á þrjá lögregluþjóna, og ólöglegan vopnaburð.

Þegar lögreglan komst á spor hans lagði hann á flótta yfir brú. Það var hinsvegar að fara úr öskunni í eldinn, því á brúnni mætti hann þrem valkyrjum sem réðust á hann og börðu hann með töskum sínum. Hann lagði á flótta frá þeim, til baka yfir brúna og hljóp þar beint í fangið á stæðilegum vörubílstjóra, sem hafði séð konurnar hjóla í hann. Bílstjórinn hélt kauða föstum þartil lögreglan kom á vettvang.