Hulunni svipt af rostungaráðgátu

Teymi danskra og grænlenskra vísindamanna hafa fest gervihnattasenda á átta rostunga í því skyni að rannsaka hvert skepnurnar halda á sumrin, en til þessa hefur mjög lítið verið vitað um ferðir rostunga yfir sumartímann.

Einnig er vonast til að sendarnir geri mögulegt að varpa ljósi á það hvaða áhrif veiðar, olíuleit og hinar hnattrænu loftslagsbreytingar hafa á rostunga Norðurhafa.

Atlantshafsrostungarnir við Vestur-Grænland eru ein af minnst átta undirtegundum rostunga sem til eru í heiminum. Sendarnir voru festir á rostunga á hafísnum milli Vestur-Grænlands og Baffins-eyjar, sem tilheyrir Kanada.

Vonast er til að sendarnir tolli á skepnunum í að minnsta kosti tvo til þrjá mánuði, jafnvel lengur. „Svona sendar eru himnasending fyrir þá sem rannsaka sjávarspendýr,“ hefur fréttavefur BBC eftir leiðangursstjóranum Mikkel Villum Jensen. Almenningi verður gert kleift að fylgjast með ferðum hinna merktu rostunga í gegnum fréttavef BBC, undir flipanum „Walrus Watch“.