Nornaseyði á Nýlendugötu

Hrund Ósk Árnadóttir söngnemi kann uppskrift að seyði sem virkar vel gegn hálsbólgu og kvefi.

Hrund Ósk Árnadóttir er komin langleiðina með að ljúka námi í klassískum söng. Hún segir máli skipta fyrir söngvara að hugsa vel um röddina og lumar á nokkrum ráðum til að halda henni góðri. Meðal annars uppskrift að seyði sem vinnur á hálsbólgu og kvefi.

„Ég bý til seyði, svona hálfgert nornaseyði, ef mér finnst ég vera að fá kvef eða annan óþverra, sem getur haft áhrif á röddina,“ útskýrir Hrund.

„Ég sýð hvítlauk og engifer í vatni. Bragðbæti það með smá sítrónusafa, hunangi og jafnvel sólhatti. Sker aukalega niður tvö rif af hvítlauk í smáa bita og gleypi með seyðinu. Það er algjör bomba.“

Hrund segir að í raun ætti að drekka soð af þessu tagi daglega og helst tvisvar á dag. „Maður fyllist af svo mikilli orku. Ég viðurkenni alveg að þetta er ekkert rosalega bragðgott og þar er kannski helst hvítlauknum um að kenna. Hann er svo rammur, sérstaklega ef maður gleypir rifin með. Ég mæli reyndar með að fólk setji þau undir tunguna á meðan það drekkur seyðið. Næringarefnin eru þá fljótari að berast inn í blóðrásina.“

Að sögn Hrund er leikurinn gerður til að hreinsa burt bakteríur. „Soðið virkar kannski ekki á einhverjar veirusýkingar, en ætti að halda kvefi í skefjum. Hafi maður á hinn bóginn kvefast ætti maður að losna við það á um það bil þremur dögum með hjálp seyðisins. Enda gert til að halda hálsi, nefi og eyrum hreinum og röddinni í himnalagi.“