Styður kenningu Heyerdahls

Kjúklingar sem mannafæða bárust til Ameríku frá Pólýnesíu í Kyrrahafi, en ekki frá Evrópu. Þessi uppgötvun, sem byggist á fundi kjúklingabeina í fornleifauppgreftri í Chile, rennir stoðum undir kenningu norska ævintýramannsins Thors Heyerdahl um að siglingar hafi tíðkast yfir Kyrrahafið til forna.

Rannsóknir hafa sýnt að kjúklingabein sem fundust í uppgreftri við strönd Chile séu af kjúklingum sem lifðu á árabilinu 1304-1424. Rannsókn á erfðaefninu í beinunum sýndi auk þess fram á að kjúklingarnir komu upprunalega frá Pólýnesíu. Þetta kemur fram á fréttavef norska blaðsins Aftenposten.