Sleipur í viðskiptum

Starfsmenn bankanna hafa margvíslegan og fjölbreyttan bakgrunn. Bókvit dugar skammt þegar komið er út á vinnumarkaðinn og því verða menn að öðlast verkvitið sem allra fyrst. Liðsmenn greiningardeildar Landsbankans eiga margir glæstan starfsferil að baki þegar þeir ráða sig til vinnu. Þannig hefur einn starfað sem yfirflugumferðarstjóri á Pristina-flugvelli í Kosovo og annar verið viðskiptablaðamaður á Mogganum. Sá þriðji á þó líklega skemmtilegasta starfið að baki en sá hafði yfirumsjón með áætlanagerð og stefnumótun í Global Lubricants-deild Chevron. Ósagt er látið á ferilskránni um hvers kyns sleipiefni er að ræða. Ætla má að reynslan nýtist viðkomandi vel í starfi, enda nauðsynlegt að fjárfestar eigi kost á greiðum aðgangi að opnunum á hlutabréfamarkaði.