Svínsleg aðför

Breskur landbúnaðarverkamaður var fluttur á sjúkrahús eftir að hafa orðið fyrir árás svínahjarðar, um síðustu helgi. Stór og feit gylta velti manninum um koll og réðist samstundis á hann, þar sem hann lá í stíunni. Hin svínin lögðu þá einnig til atlögu.

Maðurinn var blár og marinn og með höfuðáverka, eftir árásina, en ekki í lífshættu. Talsmaður lögreglunnar í Norfolk sagði að þeir hefðu aldrei áður heyrt um samræmda svínaárás. Hann bjóst þó ekki við að hjörðinni yrði slátrað fyrir þessar sakir.