Sigurganga Inter heldur áfram

Ítalíumeistarar Inter Milan héldu áfram ótrúlegri sigurgöngu sinni í A-deildinni í dag þegar liðið lagði Fiorentina 3-1 eftir að hafa lent marki undir. Roma varð á í messunni og náði aðeins jafntefli við Livorno á útivelli þar sem Francesco Totti jafnaði leikinn 1-1 áður en hann var rekinn af velli í lokin.

Landsliðsframherjinn Luca Toni kom Fiorentina í 1-0 gegn Inter á Giuseppe Meazza í Mílanó, en Inter kom til baka og mörk frá Stankovic, Adriano og Ibrahimovic tryggðu meisturunum öll stigin og þar með 11 stiga forskot í deildinni.

Í öðrum fréttum frá Ítalíu bar hæst að framherjinn ungi Giuseppe Rossi átti sannkallaða draumabyrjun með liði Parma þar sem hann skoraði sigurmark liðsins í 1-0 sigri á Torino. Rossi hefði raunar átt að skora þrennu í leiknum miðað við öll færin sem hann fékk, en hann þótti ná einstaklega vel saman við félaga sinn Igor Budan í framlínunni.