Metár hjá OMX-samstæðunni

Norræna kauphallarsamstæðan OMX skilaði 911 milljónum sænskra króna í hagnað á síðasta ári. Þetta jafngildir rúmum 8,9 milljörðum íslenskra króna. Tilsamanburðar nam hagnaðurinn árið 2005 543 milljónum sænskra króna, eða rúmum 5,3 milljörðum íslenskra króna. Forstjóri samstæðunnar segir síðasta ár hafa verið að mörgu leyti metár. Samstæðan keypti meðal annars Kauphöll Íslands í fyrra.

Hagnaður OMX á fjórða ársfjórðungi í fyrra nam 296 milljónum sænskra króna, jafnvirði 2,9 milljarða íslenskra króna.

Rekstrarhagnaður í fyrra nam 1,2 milljörðum króna, 11,8 milljörðum íslenskra króna, samanborið við 910 milljónir sænskra króna, eða rúmra 8,9 milljarða íslenskra króna. Hagnaðurinn á fjórða ársfjórðungi nam 355 milljónum sænskra króna, jafnvirði tæpra 3,5 milljarða íslenskra króna, sem er 92 milljóna sænskra króna hækkun á milli ára.

Haft er eftir Magnusi Böcker, forstjóra OMX, í tilkynningu að síðasta ár hafi á margan hátt verið metár hjá OMX en bæði tekjur hafi verið með hæsta móti auk þess sem rekstrarafkoman hafi aldrei verið betri. Hagnaður á hlut jókst um 64 prósent miðað við árið á undan og arðsemi eigin fjár nam 20 prósentum. „Eftir nokkurra ára tímabil uppbyggingar hefur OMX nú náð sterkri stöðu meðal kauphalla á alþjóðavettvangi en kauphallamarkaðurinn einkennist af örum vexti," segir hann.

<a href="http://news.icex.is/newsservice/MMIcexNSWeb.dll/newspagepf?language=is&pagetype=&primarylanguagecode=is&newsnumber=36615" 

target="new_">Uppgjör OMX</a>