Mannfall í röð bílsprengjuárása í Kirkuk

Fimm eru sagðir látnir og um 40 særðir eftir röð bílsprengjuárása í Kirkuk í Norður-Írak í dag. Sjö sprengjur munu hafa sprungið á nokkrum stöðum í borginni á tveimur klukkustundum og beindust þær meðal annnar að skrifstofum tveggja kúrdískra stjórnmálaflokka sem lokaðar voru í dag.

Sprengjurnar voru að sögn írakskrar lögreglu ekki öflugar og ekki liggur fyrir hver bar ábyrgð á þeim. Útgöngubanni hefur verið komið á Í Kirkuk þar til í fyrramálið vegna sprenginganna. Við þetta má bæta að sex lögreglumenn létust og sex særðust í árás byssumanna á eftirlitsstöð lögreglu í bænum Samarra norður af Bagdad.