Chrysler segir upp starfsfólki vegna samdráttar

Bílaframleiðendurnir DaimlerChrysler hefur ákveðið að segja upp 13.000 manns í Bandaríkjunum og í Kanada og loka einni verksmiðju fyrirtækisins í Delawer. Helsta ástæðan er samdráttur í rekstri fyrirtækisins en sala á nýjum bílum undir merkjum Chrysler dróst saman um 7 prósent vestanhafs.

Í Bandaríkjunum missa 9.000 manns vinnuna en 4.000 í Kanada.

Bílaframleiðandinn, sem starfar jafnt í Bandaríkjunum og í Þýskalandi, skilaði 124 miljóna evra taprekstri í fyrra. Það svarar til 11 milljörðum íslenskra króna á tímabilinu.

Aðgerðir Chrysler eru svipaðar þeim sem Ford og General Motors hafa þurft að grípa til síðan á síðasta ári í kjölfar samdráttar í sölu á nýjum bílum. Mesti samdrátturinn er í sölu á stórum sportjeppum en neytendur í Bandaríkjunum og Evrópu hafa í auknum mæli horft til ódýrari og sparneytnari bíla frá Japan eftir að eldsneyti tók að hækka umtalsvert í fyrra.