Svíar að gefast upp á Kastrup

Sænskur þingmaður hefur sent dönsku ríkisstjórninni formlega fyrirspurn um hvort hún ætli að gera eitthvað til þess að stytta biðraðir og leysa vandamál sem skapast við innritunarborð á Kastrup flugvelli. Miklar seinkanir hafa verið daglegt brauð á flugvellinum síðustu misserin, og algengt að fólk komist ekki út í flugvélar áður en þær leggja af stað.

Þingmenn í Norðurlandaráði geta sent formlegar fyrirspurnir til norrænu ríkisstjórnanna. Þennan rétt notar sænski þingmaðurinn Hans Wallmark sér til að spyrja um Kastrup. "Flugvöllurinn á Kastrup er ekki einvörðungu þýðingarmikill fyrir Dani heldur jafnframt fyrir fjölmarga Svía sem búa handan Eyrarsunds," segir Hans Wallmark.

"Þar geta farþegar verið óheppnir á álagstíma og þurft að bíða tímum saman í biðröð við innritunarborðin. Í dönskum blöðum er hreinlega talað um "upplausnarástand á Kastrup". Mikilvægur vinnutími fer til spillis og það sem ætti að geta verið einfalt, virkt og þjónustumiðuð samgöngumiðstöð á Eyrarsundssvæðinu verður að biðröðum og óþörfum biðtíma."