Ég heiti Manchester United

Búlgarskur aðdáandi breska knattspyrnuliðsins Manchester United hefur fagnað hálfum sigri í baráttu fyrir að breyta nafni sínu í Manchester United. Maðurinn heitir Marin Levidzhev og hefur staðið í tveggja ára málaferlum til að fá að breyta nafninu.

Dómur var felldur á þá leið að honum væri heimilt að kalla sig Manchester Levidzhev. Algjör nafnabreyting var ekki samþykkt þar sem stuðningur mannsins við félagið þótti ekki nægileg ástæða.

Það fannst Manchester ekki nógu gott og hefur nú ákveðið að áfrýja úrskurðinum til hæstaréttar.

Fréttastofa Ananova hefur eftir Manchester að hann sé einungis í hálfleik: "Ég elska Manchester United. Þeir eru mér allt og ég vil að nafn mitt endurspegli það."