Inzaghi vill ljúka ferlinum í Mílanó

Framherjinn Filippo Inzaghi hjá AC Milan segist vilja ljúka ferlinum hjá félaginu þrátt fyrir að hafa átt erfitt uppdráttar í vetur. Ítalskir fjölmiðlar hafa spáð því að hann væri á förum frá Milan, en sjálfur segist hann ekki geta hugsað sér það.

Inzaghi hefur aðeins skorað tvö mörk í deildinni í vetur á meðan félagi hans Gilardinho hefur skorað átta og Ronaldo er þegar kominn með þrjú mörk síðan hann kom til liðsins frá Real Madrid.

"Ég hef aldrei hugsað neikvætt í sex ára veru minni hjá félaginu og ég á mjög sérstakt samband við forráðamenn og stuðningsmenn. Þó ekki hafi gengið sem best í vetur, hefur dvöl mín hér verið einstök og ég vonast til að ljúka ferlinum hjá AC Milan," sagði hinn 33 ára gamli framherji.