Verðbólga í Zimbabve nálægt 2.000 prósentum

Stjórnvöld í Afríkuríkinu Zimbabve hafa ákveðið að fresta birtingu verðbólgutalna um eina viku. Breska ríkisútvarpið segir að þetta athæfi bendi til þess að ríkisstjórn Roberts Mugabe vilji ekki horfast í augu við að verðbólga hafi farið úr böndunum og liggi nú nálægt 2.000 prósentum.

Í febrúar mældist 1.700 prósenta verðbólga í Zimbabve, sem fagnar því að 27 ár eru liðin í ár síðan landið fékk sjálfstæði. Upphaflega átti að birta upplýsingarnar í síðustu viku.

Þótt verðbólgutölurnar liggi ekki fyrir er því spáð að verð hafi rokið upp á milli mánaða, að mestu vegna hækkunar á heimsmarkaðsverði á hráolíu.

Svo slæmt er ástandið að sjálfur Gideon Gono, seðlabankastjóri Afríkuríkisins, hefur sagt að landið þjáist af efnahagslegu alnæmi, að sögn breska ríkisútvarpsins, BBC.

Gert er ráð fyrir að staða efnahagsmála eigi eftir að hríðversna á árinu og reiknað með að verðbólgan fari í 5.000 prósent fyrir lok þessa árs bregðist Robert Mugabe, forseti landsins, ekki við.