Royal Bank of Scotland vill ABN Amro

Royal Bank of Scotland er í forsvari fyrir þrjá evrópskra banka sem hafa formlega lýst yfir áhuga á því að leggja fram kauptilboð í ABN Amro, stærsta banka Hollands. Tilboðið er sagt hljóða upp á 72 milljarða evrur, rúmlega 6.300 milljarða íslenskra króna. Verði gengið að tilboðinu spillir það kaupum Barclays á hollenska bankanum, sem sögð eru stærstu fyrirtækjakaup í evrópski bankasögu.

Barclays og ABN Amro undirrituðu viljayfirlýsingu í vikubyrjun sem fól í sér að Barclays kaupir hollenska bankann fyrir 67 milljarða punda, jafnvirði tæpra 5.900 milljarða íslenskra króna. Fólst í kaupunum að Barclays myndi flytja höfuðstöðvar sínar til Amsterdam í Hollandi og að ABN Amro myndi selja bankastarfsemi sína í Bandaríkjunum, en síðasttalda atriðið er sagt mikilvægt skref til að ljúka kaupunum.

Bankarnir sem Royal Bank of Scotland leiðir eru spænski bankinn Santander og belgíski bankinn Fortis.

Breska ríkisútvarpið (BBC) segir að verði lagt fram formleg yfirtökutilboð í ABN Amro verði 70 prósent hlutanna greiddir með reiðufé en afgangurinn með hlutum í Royal Bank of Scotland.

BBC hefur eftir talsmönnum skoska bankans að formlegt tilboð í ABN Amro verði einungis lagt fram verði ekkert úr sölu ABN Amro á bandarísku bankastarfseminni. Gangi salan hins vegar í gegn muni bankinn fara í óvinveitta yfirtöku á ABN Amro en það þýðir að bankahópurinn undir forystu Royal Bank of Scotland gerir hluthöfum tilboð í hlutaféð í stað þess að setjast við samningaborðið með stjórn bankans.