Orðrómur á ný um yfirtöku á Sainsbury

Gengi hlutabréfa í Sainsbury, þriðju stærstu stórmarkaðakeðju Bretlands, hækkaði um 8,5 prósent fyrir opnun markaða í Bretlandi dag eftir að 15 prósent hlutabréfa í keðjunni skiptu um eigendur fyrir 1,4 milljarð punda, jafnvirði tæplega 181 milljarðs íslenskra króna. Kaupverð jafngildir 575 pensum á hlut.

Greinendur segja viðskiptin benda til að hópur fjárfesta hafi í hyggju að gera yfirtökutilboð í keðjuna á ný.

Ekki var ljóst í morgun hver seldi hlutinn í Sainsbury né hver kaupandi  er. Fréttaveitan Bloomberg segir hlutinn jafnast á við hlutabréfaeign félagsins AllianceBernstein LLP, stærsta einstaka hluthafa í stórmarkaðakeðjunni, sem hefur lýst yfir áhuga á að losa um eign sína. Þá séu líkur á á fjárfestingasjóður í Arabaríkinu Katar, sem stjórnvöld þar í landi eiga að mestu, hafi keypt hlutinn.

Greinandi hjá breska verðbréfafyrirtækinu Teather & Greenwood, sem er í eigu Landsbanka Íslands, segir hins vegar ekki loku fyrir það skotið að fjárfestirinn Robert Tchenguiz, sem einnig er stjórnarmaður í Exista, hafi keypt hlutinn. Tchenguiz flaggaði í Sainsbury í mars og hefur aukið við hlut sinn jafnt og þétt síðan þá. Nú um stundir fer hann með rúman fimm prósenta hlut í Sainsbury og hefur óskað eftir setu í stjórn verslanakeðjunnar.

Fjárfestahópur undir forystu fjárfestingasjóðsins CVC Capital vann að yfirtöku á Sainsbury allt fram til 11. apríl síðastliðinn þegar hann dró sig í hlé vegna andstöðu stærstu hluthafa í keðjunni við tilboðið sem hljóðaði upp á 582 pens á hlut, rúmlega 10 milljarða punda, jafnvirði rúmra 1.300 milljörðum íslenskra króna.

Gengi bréfa í Sainsbury stendur nú 565 pensum á hlut sem er 6,6 prósenta hækkun frá lokagengi félagsins í gær.