Mamma barði hákarlinn í klessu

Fimm barna áströlsk móðir barði hákarl svo fast í hausinn með myndavél sinni að hann sleppti taki sínu á fæti hennar og synti burt frá henni og tveimur sonum hennar. Becky Cooke er þrjátíu og átta ára gömul. Hún var ásamt fjölskyldu sinni að vaða í sjónum við ströndina í Perth, þegar hún fann eitthvað skella á fæti sínum af miklum þunga.

Hún fann ekki til neins sársauka í fyrstu en þegar hún leit niður sá hún að sjórinn var blóðlitaður og að fótur hennar var í gininu á tæplega þriggja metra hákarli. Becky hélt á þriggja ára gömlum syni sínum og eldri sonur hennar var að leika sér við hlið hennar.

"Það eina sem ég hugsaði um var að reka hákarlinn burt áður en hann næði drengjunum mínum," sagði Becky við AP fréttastofuna. Hún lét því myndavél sína dynja á haus hákarlsins, sem hrökk undan og synti burt. Sjálf gat hún ekki tekið nema tvö skref til lands áður en hún datt, enda vöðvarnir í fæti hennar stórskaddaðir.

Eiginmaður Beckyar  kom henni á sjúkrahús í Perth, þar sem hún gekkst undir mikla aðgerð. Það kemur í ljós síðar hvort hún heldur fætinum.