Vísindahvalveiðar lítillækka Japani

Ástralir segja hvalveiðar Japana í vísindaskyni gera lítið úr vísindum. Á fundi Alþjóðahvalveiðiráðsins í Alaska, sem hófst í gær, sögðu þeir að Japanir notuðu útskýringuna einungis til að komast hjá hvalveiðibanninu. Veiðarnar lítillækki bæði Japani og Hvalveiðiráðið.

Nýsjálendingar tóku í sama streng og Ástralir og sögðu enga hagnast á vísindahvalveiðum. Þeir hvöttu Japani til að hætta við áform um að veiða fimmtíu Hnúfubaka á næstu vertíð. Japanir segjast tilbúnir til að komast að samkomulagi um fjölda þeirra. Vísindaveiðum japana hefur verið harðlega mótmælt, en þeir veiða eitt þúsund hvali á ári í vísindaskyni en selja síðan kjötið.

Fjöldi mótmælenda er samankominn í Anchorage til að fylgjast með framvindu á ráðstefnunni. Sérstaklega er fylgst með setningu kvóta á hvalveiðum innfæddra í Alaska.

Gert er ráð fyrir að á fundinum ljúki með staðfestingu á hvalveiðibanninu sem verið hefur í gildi í 21 ár, þrátt fyrir táknræna samþykkt á síðasta fundi um að aflétta banninu. Til að fella það þyrfti 75 prósent atkvæða. Það hafðist ekki í fyrra. Þjóðum sem eru mótfallnar hvalveiðum hefur hins vegar fjölgað í ráðinu síðan þá.

Íslendingar, Japanir og Norðmenn halda því fram að bannið sé óþarft nú þar sem tegundir hafi fjölgað sér. Ísland og Noregur virða bannið að vettugi.