Hent fram af 15 hæða húsi

Heiftin í átökum Palestínumanna á Gaza ströndinni er slík að þegar nokkrir Hamas-liðar náðu einum lífvarða Abbasar forseta á sitt vald fóru þeir með hann upp á þak á fimmtán hæða húsi og hentu honum framaf. Liðsmenn Hamas og Fatah láta sér ekki lengur nægja að ráðast á vígi hvers annars heldur eru farnir að sprengja upp heimilin líka.

Þannig var heimili leiðtoga Al Aksa sveitanna eyðilagt. Hann sór þess eið að hefna sín; "Hús fyrir hús og blóð fyrir blóð. Ég sver við nafn Guðs að ég mun drepa alla sem eru í Hamas, hvort sem það eru hermenn eða óbreyttir borgarar.

Stjórn Fatah samtakanna mun koma saman klukkan fimm í dag til þess að ákveða hvort þau segi sig úr þjóðstjórninni með Hamas. Ef sú verður niðurstaðan má búast við að átökin breytists í hreint borgarastríð.