Mikil fjölgun í hópi Síberíutígrisdýra

Vel gengur að reisa við stofn Síberíutígrisdýra sem eru í mikilli útrýmingarhættu. Á ræktunarstöð kattardýra í Kína hefur tegundinni borist góður liðsauki með fæðingu 84 kettlinga frá því í mars á þessu ári. Í tilkynningu frá ræktunarstöðinni segir að kettlingunum heilsist vel og að von sé á að 13 læður fæði til viðbótar á næstu fjórum mánuðum.

Einungis lifa um 400 Síberíutígrisdýr villt í dag, aðallega í Austur-Rússlandi. Dýrin er meðal þeirra tíu dýrategunda sem eru í mestri útrýmingarhættu.

Hengdaohezi-ræktunarstöðin hefur reynst heilladrjúg í viðleitni sinni í að viðhalda stofninum. Stöðin var opnuð árið 1986 og hélt hún þá 8 dýr. Nú er þau orðin 750. Áætlað er að sleppa 620 þeirra út í náttúruna á komandi misserum.