Minni frjósemi hjá konum sem eiga tvíburabróður

Konur sem eiga tvíburabróður eru ólíklegri til að giftast og eignast börn. Ástæðan gæti verið sú að þær voru berskjaldaðar fyrir testósteróni bræðra sinna á meðan þau voru í móðurkviði.

Þetta er niðurstaða rannsóknar sem fræðimenn í Háskólanum í Sheffield og Háskólanum í Turku unnu saman. Hún byggðist á gögnum frá nítjándu og tuttugustu öld.

Samkvæmt rannsókninni eru 25% minni líkur á því að konur sem eiga tvíburabróður eignist börn. Þær sem eignast börn eiga tvöfalt færri börn en þær konur sem eiga tvíburasystur. Þá eru 15% minni líkur á því að konur sem eiga tvíburabróður giftist.