Real Madrid - Þrír leikmenn á leiðinni

Forráðamenn Real Madrid tilkynntu í dag að félagið væri búið að ganga frá kaupum á þýska landsliðsmanninum Christoph Metzelder frá Dortmund þar sem hann er með lausa samninga í sumar. Þá segir forseti spænska félagsins að þrír aðrir leikmenn séu á leið til Real í sumar.

"Við erum búnir að vinna að því í þrjá mánuði að fá til okkar þessa nýju leikmenn og Metzelder er sá fyrsti. Þrír aðrir eru á leiðinni og við ætlum að reyna að fá þá til að skrifa undir sem fyrst," sagði forsetinn Ramon Calderon, sem er ekki vanur að fara leynt með þá leikmenn sem eru efstir á óskalistanum.

"Við vitum að Kaka verður að fara fram á sölu frá AC Milan áður en hann getur komið hingað og við erum allir að vona að svo verði," sagði Calderon, sem lofaði að kaupa Kaka áður en hann settist í forsetastólinn í júní á síðasta ári. Þá er enn óráðið hvað verður með þjálfarann Fabio Capello sem skilaði titli í hús á dögunum þrátt fyrir stormasamt samband við forseta félagsins.