Fasteignaverð lækkar í Bretlandi

Fasteignaverð lækkaði lítillega í Bretlandi á milli mánaða í ágúst. Breska dagblaðið Guardian segir þetta fyrstu merki þess að samfellt hækkanaferli síðustu tveggja ára sé á enda og kennir háum vaxtastigi um. Verð á fasteignum í og við Lundúnir hefur hins vegar haldið áfram að hækka.

Fasteignaverð í Bretlandi hefur hækkað gríðarlega síðustu tvö ár. Stýrivextir hafa að sama skapi hækkað jafnt og þétt, eða fimm sinnum, síðastliðna tólf mánuði, og segir Guardian nú svo komið að mjög erfitt sé fyrir fólk að festa sér sína fyrstu íbúð. Þá hafi hátt verðlag og vaxtakjör hafi gert það að verkum að fólk í fasteignahugleiðingum hafi haldið að sér höndum og sé það að nokkru leyti því að kenna að fasteignum á söluskrá hafi fjölgað.

Guardian segir að ástandið muni aðeins versna vegna óróleika á alþjóðlegum fjármálamörkuðum en bankar og fjármálafyrirtæki hafi hækkað vexti á fasteignalánum. Aðgerðir Englandsbanka, sem hélt stýrivöxtum óbreyttum í síðastu viku, hafi því ekki skilað tilætluðum árangri, að mati Guardian.

Lundúnasvæðið er það eina í Bretlandi þar sem verðlækkunar hefur ekki orðið vart. Verðið hækkaði enn á svæðinu í ágúst. Guardian segir ástæðuna einfaldlega þá, að hjarta fjármálalífsins í Bretlandi sé staðsett þar í borg og hafi háar bónusgreiðslur til starfsmanna fjármálafyrirtækja á árinu haldið fasteignaverðinu háu.